ಹೀಗೊಂದು ಮೆಟ್ರೋ ಪ್ರಹಸನ

 ಈ ಬ್ಯಾಸಗಿ ಬಿಸಿಲಿನ ಝಳಕ್ಕ ಹೊರಗ ಬೀಳಬೇಕು ಅನ್ನಿಸೋದಿಲ್ಲ , ಅಷ್ಟಪರಿ ಸೂರ್ಯ ಹೊತ್ತಿ ಉರಿತಿರತಾನ. ಎಲ್ಲ ಮಹಾನಗರಗಳೊಳಗ ಈ ಮೆಟ್ರೋರೈಲು ಆಗಿ ತಣ್ಣಗ ಎಸಿನಾಗ ಹೋಗೊ ಹಂಗ ಆಗೆದ. ಇದು ಅಲ್ಲದ ಸ್ವಲ್ಪ ಇದರಿಂದ ಪರಿಸರ ಮಾಲಿನ್ಯನೂ ಕಡಿಮೆ ಆಗೇದ. 

2002ರೊಳಗ ಸುರು ಆದ ದಿಲ್ಲಿ ಮೆಟ್ರೋ ದೇಶದ ಎರಡನೇ ಮೆಟ್ರೋ ಸೇವೆ (ಮೊದಲು ಸುರು ಆಗಿದ್ದು ಕೋಲ್ಕತ್ತಾ).  ಭರ್ತಿ 9 ಲೈನಗಳು ಇರೋ ಇದು ದಿಲ್ಲಿಯ ಜೀವನಾಡಿಯಾಗೆದ. ಇದರ ವಿಶೇಷತೆ ಏನಂದರ ಇದು ಬೇರೆ ನಗರಗಳನ್ನ ಅಷ್ಟ ಅಲ್ಲ ರಾಜ್ಯಗಳನ್ನೂ ಸೇರಸ್ತದ, ಉದಾಹರಣೆಗೆ ಉತ್ತರ ಪ್ರದೇಶದ ನೊಯಿಡಾ, ಗಾಜಿಯಾಬಾದ್, ಹರಿಯಾಣಾದ ಗುರುಗ್ರಾಮ , ಫರಿದಾಬಾದ್. 

ಆಮೇಲೆ ನೀವ ಎಂದಾದರೂ ಈ ಮೆಟ್ರೋದಾಗ ಪ್ರಯಾಣ ಮಾಡೋದಾದ್ರ ಅಗದಿ ಟೈಮಿಗೆ ಸರಿಯಾಗಿ ಸ್ಟೇಷನಕ್ಕ ಹೋಗಬೇಕ ಮತ್ತ , ಯಾಕಂದ್ರ ದೆಹಲಿ ಮೆಟ್ರೋ ನಿಖರವಾದ ಸಮಯಕ್ಕ ಬರತದ. ವಾಸ್ತವವಾಗಿ 99.7% ಸಮಯಕ್ಕೆ ಸರಿಯಾಗಿ ಚಲಿಸೋ ಸಾರಿಗೆ ವ್ಯವಸ್ಥೆ ಇದಾಗೆದ. ನಮ್ಮಲ್ಲೆ ಇಷ್ಟಪರಿ ಟೈಮಿಗೆ ಸರಿ ಇರೋದು ಒಂದು ಆಶ್ಚರ್ಯ ಅಲ್ಲದ ಇನ್ನೇನು? 

ಸುಖಕರ ಪ್ರಯಾಣ ಒಂದೇ ಅಲ್ಲ ಇದರಾಗ ಹೋಗೋ ಮುಂದ ನಿಮಗ ಮಜಾ ಮಜಾ ಮಂದಿ ನೋಡಲಿಕ್ಕೆ ಸಿಗತಾರ. ತಲಿ ತಗ್ಗಿಸಿ ಮೊಬೈಲ್ ತಿಕ್ಕವರು ಅಂತೂ ಎಲ್ಲಾ ಕಡೆ ಇಧಾಂಗ ಇಲ್ಲೇನೂ ಇರತಾರ! ಅವರನ್ನ ಬಿಡ್ರಿ!! ಅದಲ್ಲದ ಬಾಜುದವರ ಫೋನದಾಗ ಹಣಿಕಿ ಹಾಕೋ ಮಹಾಪುರುಷರು ಇರತಾರ, ಮಹಿಳೆ ಅಥವಾ ವೃಧ್ಧರ ಸೀಟನಾಗ ಕೂತು ನಕಲಿ ನಿದ್ದಿ ಮಾಡವರು (ಯಾರು ಎಬ್ಬಿಸಬಾರದಲಾ ), ದಾರಿ ಒಳಗ ಮೇಕ್ಅಪ್ ಮಾಡಕೊಳ್ಳವರು, ಸೇಲ್ಫಿ ತಕ್ಕೊಳವರು, ಇನ್ನ ಕೊನೆ ಕಂಪಾರ್ಟ್ಮೆಂಟ್ ನಾಗ ಕೆಲ ವಿದ್ಯಾರ್ಥಿಗಳು, ಯುವಕರು ಶಿಸ್ತಾಗಿ ಕೆಳಗ ಕೂತು ತಮ್ಮ ಪ್ರಾಜೆಕ್ಟು ಅಸೈನ್ಮೆಂಟು ಮಾಡ್ಕೊತ ಮಗ್ನ ಆಗಿ ಬಿಟ್ಟಿರತಾರ. ಈ ನೆಲದ ಸೀಟ್ ಮ್ಯಾಲೆ, ಎಲ್ಲೂ ಕೂಡಲಿಕ್ಕೆ ಜಾಗ ಸಿಗದ ದಣಿದ ಜೀವಿಗಳೂ ಇರತಾರ

ಇನ್ನೊಂದೆರಡು ಕಾರಣಕ್ಕ ನನಗ ಈ ಮೆಟ್ರೋ ಪ್ರೀಯ ಆಗೆದ ಅಂದ್ರ ಇದರ ಲೈನ್ ಗುಂಟ ಮಳೆ ನೀರು ಕೊಯ್ಲು ವ್ಯವಸ್ಥಾ ಅದ. ಅಂದ್ರ ಲೈನ್ ಮ್ಯಾಲೆ ಬಿದ್ದ ಒಂದ ಮಳಿಹನಿನೂ ವ್ಯರ್ಥ ಆಗಂಗಿಲ್ಲ. ಇನ್ನೊಂದು ಅಂದ್ರ ಇದರ ಎಸ್ಕಲೇಟರನಾಗ "ಸಾರಿ ಗಾರ್ಡ್" ಅವ. ಅಂದ್ರ ನೀವು ಮೆಟ್ರೋದಾಗ ಪ್ರಯಾಣಿಸೋ ಮುಂದನೂ ಮಸ್ತ ರೇಶ್ಮಿ ಸೀರಿ ಉಟಗೊಂಡ ಹೋದ್ರ ನಡೀತದ ಅಂತಾತು. 

ಇನ್ನೊಂದು ಕೊನೆ ಗುಟುಕು: ಮುಂದಿನ ಸಲ ನೀವು ದಿಲ್ಲಿ ಮೆಟ್ರೋನಾಗ ಹೋದ್ರ ಅಲ್ಲಿ ಕೇಳಿ ಬರೋ ಧ್ವನಿಗಳು ಇರ್ತವಲಾ ಅವನ್ನ ಲಕ್ಷಕೊಟ್ಟ ಆಲಸರಿ. ಮತ್ತ ನೀವು ಹಿಂದಕ ದೂರದರ್ಶನ ನೋಡಿದವರು ಆಗಿದ್ರ ನಿಮಗ ಈ ಧ್ವನಿಗಳು ಪರಿಚಿತ ಅನಸ್ತಾವ. ಅವು ಯಾರವು ಅಂದ್ರ ; ಹಿಂದಿಯಲ್ಲಿ ಧ್ವನಿ ನೀಡಿದವರು "ಶಮ್ಮಿ ನಾರಂಗ" ಮತ್ತ ಇಂಗ್ಲಿಷ್ ಧ್ವನಿಯ ಒಡತಿ "ರೀನಿ ಖನ್ನಾ" . ಇವರಿಬ್ಬರೂ ಕ್ರಮವಾಗಿ ಹಿಂದಿ ಮತ್ತ ಇಂಗ್ಲಿಷ್ ಸಮಾಚಾರ ಓದತಿದ್ರು, ನೆನಪಾಗಿಲ್ಲ ಅಂದ್ರ ಈ ಫೋಟೋ ನೋಡ್ರಿ.