ದಿಲ್ಲಿ ಕಿ ಸರ್ದಿ

     ನಮ್ಮ  ಕರ್ನಾಟಕದ ಹವಾಮಾನ ನೋಡ್ರಿ ಅಗದಿ ಮಸ್ತ್ ಇರತದ ಜಾಸ್ತಿ ಚಳಿ ಇಲ್ಲ ಜಾಸ್ತಿ ಸೆಕೆ ಇಲ್ಲ. ಆದ್ರ ದಿಲ್ಲಿನಾಗ ಎರಡೂ ಅತಿರೇಕ ಅಂತ ನಿಮಗ ಗೊತ್ತ ಇದ್ದಿದ್ದ ಅದ.ನಾ ಮೊದಲನೇ ಸಾರಿ ಇಲ್ಲೇ ಬಂದಿದ್ದು ಬ್ಯಾಸಗಿನಾಗ. ಇಲ್ಲಿ ರಣ ರಣ ಬಿಸಿಲು ನೋಡಿ ಈ ಊರಾಗ ಚಳಿ ಇರತದ ಅಂತ ಕಲ್ಪನಾ ಮಾಡಲಿಕ್ಕೂ  ಆಗವಲ್ಲತ  ಆಗಿತ್ತು.

     ಅಕ್ಟೋಬರ್  ತಿಂಗಳು ಮೊದಲನೇ ವಾರ  ಇರಬೇಕು ನನಗ ಆಜು ಬಾಜೂದವರು ಸಲಹಾ ಕೊಡಲಿಕತ್ತರು. ಚಳಿ ಶುರು ಆಗತದ ರಜಾಇ ಸ್ವೆಟರ್ ಎಲ್ಲ ಖರೀದಿ ಮಾಡಿ ಇಟ್ಟಕೊ ಅಂತ. ಆತ ಬಿಡ ಅನ್ಕೊಂಡು ನಾನೂ ರಜಾಇ  ತೊಗೋಳಿಕ್ಕೆ  ಹೋದೆ. ಇದಕ್ಕೂ ಮೊದಲು ನಾವೆಲ್ಲ ಜಾಸ್ತಿ ನೋಡಿದ್ದು ಲೈಟ್ ವೇಟ್ ರಜಾಇ, ಇಲ್ಲೇ ನೋಡಿದ್ರ ಒಳ್ಳೆ ಹಾಸಗೋಳ್ಳೋ  ಗಾದಿ ಇರತದಲ್ಲಾ ಅದರ  "ತಮ್ಮ" ಇದ್ದ ಹಂಗ ದಪ್ಪ ಇದ್ದವು. ಇದನ್ನ ಹೋತಗೊ ಬೇಕಾ ಅಷ್ಟು ಥಂಡಿ ಇರತದಾ? ಸಂಶಯ ನನಗ ಇನ್ನೂ ಬಿಟ್ಟಿದ್ದಿಲ್ಲ.

     ಆದ್ರ ಆ ಸಂಶಯ ಭಾಳ ದಿವಸ ಏನ್ ಉಳಿಲಿಲ್ಲ ಮತ್ತ!!!!  ನವಂಬರ್ ಇಂದ   ಸುರು ಆತ ನೋಡ್ರಿ ಈ ಥಂಡಿ, ಮೊದಲ  ಒಂದ  ಚಾದರ, ಆಮೇಲೆ  ಎರಡು  ಆಮೇಲೆ  ರಗ್ಗು . ಇನ್ನ  ಅದೂ ಸಾಲವಲ್ಲತ ಆತು ಅವಾಗ ಈ "ಗಾದಿ ತಮ್ಮ" ಅನ್ನೋ ರಜಾಇ ಹೊರಗ ತಗಿಬೇಕಾತು!!!

ಬಣ್ಣ ಬಣ್ಣದ ಉಣ್ಣೆಯ ಉಡುಪುಗಳು 

     ಆದ್ರ ಏನ ಅನ್ನರಿ ಈ ಥಂಡಿದೂ ಒಂದ ಮಜಾನೇ ಬೇರೆ. ಮುಂಜಾನೆ ಒಂಬತ್ತ ಹೊಡದ್ರೂ ಮುಂದಿನ  ದಾರಿ  ಕಾಣಲಾರದಂಗ  ಇರೋ ಮುಸುಕಿದ ಮಂಜು,  ಹಿಂತಾ  ಮಂಜನಾಗೂ  ಕಣ್ಣ  ಮೂಗ  ಎರಡು  ಬಿಟ್ಟ  ಎಲ್ಲ ಕವರ್  ಮಾಡ್ಕೊಂಡ್  ಸಾಲಿಗೆ ಹೋಗೋ ಸಣ್ಣ ಹುಡುಗೋರು.  ಹತ್ತ ಗಂಟೆಕ್ಕ ಎಳೆ ಬಿಸಲು,  ಆ ಬಿಸಲ ಕಾಯಿಸಗೋತ   ಕೂತ ಅಜ್ಜಿಗೊಳು,  ನಾ ಅಂತೂ  ಬಿಸಿ  ಬಿಸಿ  ಶುಂಠಿ  ಚಹಾ  ಕುಡಕೋತ ಬಾಲ್ಕನಿನಾಗ  ಈ ಎಲ್ಲ ಮುಂಜಾನೆ ದೃಶ್ಯಗಳನ್ನ   ಆನಂದಿಸುತಿದ್ದೆ .

    ಈ ಅಜ್ಜಿಗೋಳದು  ಮನಿ  ಮಂದಿಗೆಲ್ಲ  ಬಣ್ಣ  ಬಣ್ಣದ  ಸ್ವೇಟರ್ ಹೆಣೆಯೋ ಸಂಭ್ರಮ ನೋಡಬೇಕ್ರಿ. ಎಳೆ ಬಿಸಿಲಾಗ   ಸ್ವೇಟರ್  ಹೆಣಕೋತ " ನಮ್ಮ ಕಾಲದಾಗ  ಎಷ್ಟರೇ ಥಂಡಿ ಇರತಿತ್ತು, ಈಗ ಎಲ್ಲ ಕಡಮಿ ಆಗಿ ಬಿಟ್ಟದ" ಅಂತ ಹಳೆ ಪ್ರಸಂಗ ನೆನಪ ಮಾಡಕೋತ ನಡುವ ನಡುವ ಶೇಂಗಾ ಬೆಲ್ಲ ಅಥವಾ ಎಲ್ಲ ಚಿಕ್ಕಿ ಸವಿತಿರತಾರ.

      ಈ ಚಳಿಗಾಲಕ್ಕ ದಿನಚರಿನೂ ಹೊತಗೊಂಡ ಮಲಗಿ ಬಿಡತದ  ಏನೋ ? 11:30 ತನಕ  ಬೆಳಗ  ಆದಂಗ  ಅನಸುದಿಲ್ಲ . ಎಲ್ಲ ಸ್ವಲ್ಪ  ಸಾವಕಾಶನೇ  ನಡೀತದ.

ತರಾವರಿ ಚಿಕ್ಕಿಗಳು,  ಇವುಗಳಿಗೆ "ಗಜಕ್ " ಅಂತಾರ 

      
 ಹೊತ್ತು  ಮುಳಗೋದು  ಮಾತ್ರ  ಅಗದಿ ಲಗೂ. ಒಮ್ಮೆ  ಸಂಜಿ  ಆತು  ಅಂದ್ರ  ಮಾತ್ರ  ಅದ ಕಟ- ಕಟ  ಕುಟು -ಕುಟು  ಚಳಿ. ಅಂಗಡಿ  ಮುಗ್ಗಟ್ಟು  ಬೇಗನೆ  ಬಂದ ಆಗತಾವ. ಹೊರಗ  ಹೋದವರು  ಹಕ್ಕಿ ಗೂಡ ಸೇರೋ ಹಂಗ ಮನಿ ಒಳಗ ಬೆಚ್ಚಗ ಸೇರಕೊಂಡ ಬಿಡತಾರ. ಎಲ್ಲರ ಮನ್ಯಾಗಿಂದ ಪರಾಠಾದ್ದು  ಘಮ  ಬರಲಿಕ್ಕೆ  ಸುರು ಆಗತದ.