ಪಾಪಡಿ ಚಾಟ್ ಅಂತ ಬ್ಲಾಗ್ ಹೆಸರಿಟ್ಟು ಚಾಟ್ ಬಗ್ಗೆ ಬರಿಲಿಲ್ಲ ಅಂದ್ರ ಹೆಂಗ ನಡಿತದ ಹೇಳ್ರಿಲಾ! ಇವತ್ತ ನೋಡೋಣ ಬರ್ರಿ ದಿಲ್ಲಿ ಚಾಟ್ ನಾಗ ಏನೇನು ಮೆನು ಅದ. ಚಾಟ್ ಅಂದ್ರ ಸಾಕು ಬಾಯಾಗ ನೀರು ಬರ್ತಾವಲಾ...?
ಚಾಟ್ ಅಂದ ಕೂಡಲೇ ನಮಗೆಲ್ಲ ಅಗದಿ ಮೊದಲು ನೆನಪು ಬರೋದು ಪಾನಿಪೂರಿ. ಭಾಳ ಟೆನ್ಶನ್ ಆದಾಗ, ಮನ್ಯಾಗ ತಿಂದು ಬ್ಯಾಸರ ಆದಾಗ, ಬಾಯಿ ಕೆಟ್ಟಾಗ ಇದಕೆಲ್ಲ ಪಾನಿಪೂರಿ ಪರಮ ಔಷಧಿ , ಬಾಯಿ ಒಳಗ ಪಟ್ ಅಂತ ಪೂರಿ ಒಡದು ಜೀರಿಗೆ ಘಮದಿಂದ ಕೂಡಿದ ಖಾರ, ಸಿಹಿ ಮಿಶ್ರಿತ ನೀರಿನ ಸುನಾಮಿ ರಸಗ್ರಂಥಿಗಳ ಮೂಲಕ ಮೆದಳನ್ನು ತಲುಪಿದಾಗ ಆಗೋ ಅನುಭವ ತಿಂದವನೇ ಬಲ್ಲ.
ಇನ್ನ ಬಾಕಿ ನಮ್ಮ ಕಡೆ ಸಿಗೋ ಇತರೆ ಚಾಟ್ ಗಳು ಅಂದ್ರ - ಶೇವ್ ಪೂರಿ , ಮಸಾಲಾ ಪೂರಿ, ಭೇಳ, ಪಾವ್ ಭಾಜಿ ದಾಬೇಲಿ ಇನ್ನೂ ಏನೇನೋ. ಆಮೇಲೆ ಕರಿದ ಸ್ಟ್ರೀಟ್ ಫುಡ್ ನಾಗ ಕಾಂದಾ ಭಜಿ , ಬಟಾಟ ಭಜಿ ,ವಡಾ ಪಾವ್ ಭಾಳ ಪ್ರಸಿದ್ಧ ಇರ್ತಾವ ನಮ್ಮಲ್ಲೆ. ಇವುಗಳ ಹೆಸರನ್ಯಾಗ ಬಟಾಟ, ಕಾಂದಾ ಇರೋದು ನೋಡಿದ್ರ ಇವೆಲ್ಲ ಮುಂಬಯಿಯಿಂದ ಆಮದು ಆಗ್ಯಾವ ಅಂತ ಯಾರದ್ರೂ ಹೇಳಬಹುದು. ಅದಕ ಇವುಗಳ ಒಳಗ ಪಾವ್ ಅನ್ನೋದು ಒಂದು ಮುಖ್ಯ ಪಾತ್ರಧಾರಿ, ಶೇವ್ ಮತ್ತ ಉಳ್ಳಾಗಡ್ಡಿಗೆ ಪ್ರಮುಖ ಪೋಷಕ ಪಾತ್ರ.
ಇನ್ನ ನಡ್ರಿ ಮುಂಬಯಿ ದಾಟಿ ಮುಂದ ದಿಲ್ಲಿಗೆ ಹೋಗೋಣ. ಅಲ್ಲೇನೂ ಸಹ ಈ ಪಾನಿಪುರಿ ಅನ್ನೋದು ಇದ್ದೆ ಅದ. ಆದ್ರ ಅದರ ಹೆಸರು ಮಾತ್ರ “ಗೊಲಗಪ್ಪಾ”. ಅಂದ್ರ ಗೋಲ್ ಗೋಲ್ ಇರ್ತದ ಬ್ಯಾಯಾಗ ಹಾಕ್ಕೊಂಡು ಗಪ್ಪ್ ಮಾಡಬೇಕು ಅಂತ ಅರ್ಥ. ಇದರಾಗ ಒಂದು ಮಜಾ ಟ್ವಿಸ್ಟ್ ಏನಂದರ ನಮ್ಮ ಕಡೆ ಪೂರಿ ಒಂದೇ ಥರದ್ದು ಸಿಕ್ರ ಇಲ್ಲೇ ಎರಡು ಪ್ರಕಾರದ್ದು ಇರತಾವ ; ಆಟಾ (ಗೋಧಿಹಿಟ್ಟು) ಮತ್ತ ಸೂಜಿ (ರವಾ). ಎರಡೂ ಆಕಾರ ಮತ್ತ ರುಚಿವಳಗ ಬೇರೆ ಬೇರೆ ಇರ್ತಾವ. ರವಾದ್ದು ಅಗದಿ ದುಂಡ ಇರಲ್ದೆ ಸ್ವಲ್ಪ ಅಂಡಾಕೃತಿ ಇರ್ತದ.
ಇನ್ನ ದಿಲ್ಲಿ ಕಡೆ ಭಾಳ ಪ್ರಸಿದ್ಧವಾದ ಚಾಟ್ ಅಂದ್ರ ಪಾಪಡಿ ಚಾಟ್, ದಹಿ ಭಲ್ಲೆ, ದಹಿ ಔರ್ ಸೋಂಟ್ ವಾಲೆ ಗೊಲಗಪ್ಪೆ, ಆಲೂ ಟಿಕ್ಕಿ, ಆಲೂ ಚಾಟ್, ಹಿಂಗ ಲಿಸ್ಟ್ ಬೆಳಿತದ. ಕರಿದ ಸ್ಟ್ರೀಟ್ ಫುಡ್ ಅಂದ್ರ ಸಮೋಸಾ, ಬ್ರೆಡ್ ಪಕೋಡ, ಜೀಲೆಬಿ ಇವು ಹಿಟ್ ಲಿಸ್ಟ್ ನಲ್ಲಿ ಅವ. ಛೋಲೆ ಭಟುರೆಗೆ ತನ್ನದೇ ಆದ ಪ್ರಮುಖ ಸ್ಥಾನ ಅದ. ಇದು ನಾಷ್ಟ, ಊಟ ಮತ್ತ ಯಾರಿಗರೇ ಪಾರ್ಟಿ ಕೊಡೋದು ಹಿಂಗ ಎಲ್ಲ ಕಡೆನೂ ಸಲ್ಲತದ.
ಚಾಟ್ ಅಂದ್ರ ಬರಿ ಹುಳಿ ಮತ್ತ ಖಾರ ಅನ್ಕೊಬ್ಯಾಡ್ರಿ. “ದೌಲತ್ ಕಿ ಚಾಟ್” ಅನ್ನೋದು ಹಳೆಯ ದಿಲ್ಲಿಯಲ್ಲಿ ಸಿಗೋ ಒಂದು ಸಿಹಿ ಪದಾರ್ಥ. ಹಸಿ ಹಾಲನ್ನು ರಾತ್ರಿಯಿಡಿ ಮಂಜುಗಡ್ಡೆ ಮೇಲೆ ಇಟ್ಟು ತಣ್ಣಗಾಗಿಸಿ , ಕೇಸರಿ ಮತ್ತು ಒಣ ಹಣ್ಣು ಸೇರಿಸಿ ಮಾಡಿದ ದೌಲತ್ ಕಿ ಚಾಟ್ ಕೇವಲ ಚಳಿಗಾಲದಲ್ಲಿ ಮಾತ್ರ ಸಿಗತದ.
ನೀವು ಮುಂದಿನ ಸಾರಿ ದಿಲ್ಲಿಗೆ ಹೋದ್ರ ಚಾಂದನಿ ಚೌಕ್ , ಕಮಲಾ ನಗರ್ , ಕರೋಲ್ ಬಾಗನಾಗ ಇವನ್ನೆಲ್ಲ ಮನಸ್ಪೂರ್ತಿಯಾಗಿ ಸವಿಬಹುದು. ಹೆಂಗಿತ್ತು ನಿಮ್ಮ ಅನುಭವ ಅಂತ ಹೇಳೋದು ಮಾತ್ರ ಮರಿಬ್ಯಾಡ್ರಿ ಮತ್ತ .
